Հարգելի՛ ընթերցողներ,

Բարի գալուստ մեր 2026 թվականի առաջին հրատարակությանը։

Ուրախությամբ ցանկանում ենք տեղեկացնել, որ մեր պարբերականը եռամսյակայինից վերափոխվել է երկամսյա հրատարակության։ Այսուհետ, նախկինում տարեկան լույս տեսնող չորս համարի փոխարեն, մենք կհրատարակենք վեց համար։

«Մունետիկ» պարբերականի 2026 թվականի առաջին համարը (թիվ 13) ամփոփում է 2025 թվականի դեկտեմբերին և 2026 թվականի հունվարին Լեհաստանի հայ համայնքի կյանքում տեղի ունեցած կարևոր մշակութային, գիտական, հասարակական և կրոնական իրադարձությունները։

Այս համարում ընթերցողները կարող են ծանոթանալ դոկտոր Անջեյ Գլինսկու՝ Գրեգորժ Պիրամովիչի անվան ինստիտուտի նախագահի, «Լվովի հայերը և թագադրությունները XVII դարի երկրորդ կեսին» վերնագրով հոդվածին, որը ներկայացնում է հետաքրքիր և արժեքավոր նյութեր լեհ թագավորների թագադրությունների արարողություններին մասնակցած հայկական պատվիրակությունների մասին։

Համարում ընդգրկված է նաև Տեր Աթանաս Սարգսյանի «Մեծ Պահքի կիրակիների ոսկե շղթան» հոդվածը, որը բացահայտում է Մեծ Պահքի հոգևոր խորհուրդը՝ հիմնված Կոստանդնուպոլսի Հայոց Պատրիարք, Ամենապատիվ Տեր Շնորհք արքեպիսկոպոս Գալուստյանի համանուն աշխատության վրա։

Ուրախությամբ արձանագրում ենք, որ վերջին ժամանակահատվածում մեր պարբերականը շարունակել է իր զարգացումը՝ ընդլայնելով ընթերցողների շրջանակը և ամրապնդելով համագործակցությունը Հայաստանի, Լեհաստանի և այլ երկրների գիտամշակութային հաստատությունների և անհատների հետ։

Մաղթում ենք հաճելի ընթերցում։

Հրաչյա Բոյաջյան
Խմբագրական խորհրդի նախագահ